تیرہویں فصل - حضرت ابن سیرین

Topic: تیرہویں فصل

حضرت ابن سیرین رحمتہ اللہ علیہ نے فرمایا ہے، تعبیر بیان کرنے والے کے لئے یہ شرط ہے کہ با طہارت ہو اور اگر اس کا کوئی دشمن ہے تو دشمنی کی وجہ سے ناجائز تعبیر نہ بیان کرے اور جس شخص کی بدی جانے دوسروں کو نہ بتائے۔ حضرت مغربی رحمتہ اللہ علیہ نے فرمایا ہے کہ خواب دیکھنے والا خواب میں کمی بیشی نہ کرے اور جھوٹ سے بچے۔ کیونکہ حدیث شریف میں ہے کہ سچا خواب حق تعالے اور بندے کے درمیان امانت ہے۔ آنحضرت صلی اللہ علیہ وسلم نے ارشاد فرمایا ہے : جو کوئی مجھ پر کہ میں رسول ہوں، جھوٹ بولتا ہے، وہ اپنے اوپر تباہی اور بربادی کی گواہی دیتا ہے۔ لہذا جو شخص جھوٹا خواب گھڑتا ہے، آنحضرت صلی اللہ علیہ وسلم کے ارشاد کے بموجب گناہ گار ہے اور یہ بات خواب کی عظمت اور بزرگی پر دلیل ہے اور سائل اور تعبیر بیان کرنے والے پر ادب کا نگاہ رکھنا شرط ہے۔